الكاتب: Smail Limouni
---------------السلام عليكم خوتي
المهم، فهاد السلسلة غانتكلم على النظريات ديال التنظيم او بالاحرى التسيير (théories des organisations)،
خاصكم تعرفو بلي الثورة الصناعية الثانية، را ماولداتش لينا غير "التطور تقني" و انما ادت لظهور مجموعة من نظريات و طرق التنظيم و كان السبب الرئيسي لظهرهم هو توسع الانتاج، ادن كان خاص ضروري العمل يتنضم.
هاد النظريات ديال التنظيم ماهي عبارة الا على واحد التربية علمية و متعددة التخصصات اللي كاتعتامد على مختلف فروع علم الانسان (علم التفس، علم الاجتماع،الاقتص
و بانو بزاف ديال المدارس اللي كل وحدة و الايديولوجية ديالها فالتسيير مند 1900 حتال دابا.
غانقدم دابا و نشرح واحد الرسم ديال ريتشارد سكوت (Schéma de Richard Scott)، هاد السيد استاطع انه ينتج لينا واحد الرسم مبياني (لي فالصورة المرفوقة مع البوست) اللي كاي ميز فيه 4 المراحل اساسية اللي كاتصور لينا التطور ديال التنظيم المقاولاتي من مدرسة لاخرى.
*كيما كاتشوفو فالرسم المبياني ان فيه 2 محاور، المحور الافقي كايورينا التطور ديال الانظمة ديال المقاولات، و كاينين 2 انواع ديال الانظمة.
- نظام مغلق: هنايا، المقاولة كاتكون بكل بساطة منغلقة على البيئة ديالها، يعني المقاولة كاتدبر غير المكونات الداخلية دياها. و هاد النظام راه تجاوز ومابقا تاواحد كايديرو مند 1960 و دلك بظهور مدرسة الطوارئ (Ecole de contingence) للي غاتبين الاهمية ديال البيئة فتحديد البنية (Structure تاهادا بحر... غانطرق ليه من بعد) ديال المقاولة (هضرة اخرى هنا اللي غادي نشوفوها بالتفاصيل من هنا للقدام).
- نضام مفتوح: هنايا، المقاولة كاتولي معتامدة على البيئة ديالها، يعني ديما كاتحاول تكيف معاه.
غير واحد النقطة: منين كانقول البيئة راه كانلمح لكاع دوك الاطراف الفاعلة ديال المقاولة من فوغنيسوغ و زبناء و منافسين و الدولة .....
*بالنسبة للمحور التاني، كايورينا التطور ديال المقاربات.
-ففي الاول كانت المقاربة عقلانية : يعني ان المقاولة كاتقلب هنا على عقلنة العمل باش توصل للفعالية التقنية و الاقتصادية ديالها، و هادشي يمكن ليها توصل ليه عبر تنفيد واحد المنهاج ديال تنظيم العمل اللي كايكون مبازي على "la raison" و اهم تيار لي نجح ليه هاد العقلنة ديال العمل هو Taylorisme (غادي نشوفوه فالحلقة التانية من السلسلة).
-من بعد غادي تجي المقاربة الاجتماعية: هنا المقاولة راها ديما فالمسيرة ديالها للوصول للفعالية التقنية و الاقتصادية ديالها (لي غاتمكنها من تحقيق ارباح و هادا هو الهدف الرئيسي ديال اي مقاولة)، غير فهاد المقاربة، المقاولة غاتبدا ديها شوية فالموارد البشرية ديالها (دابا نشوفو علاش تسماو "موارد" ).
دابا بما اننا فهمنا الرسم المبياني، غانشوفو شنو بغا يوصل لينا Scott. لي بغا يصور لينا هو ان هاد اربعة مدارس (ecole classique, ecole des relations humaines, ecole de contingence, ecole sociologique et economique) هما اللي كايشكلو اهم المراحل ديال التطور ديال تظريات التسيير بمعنى الافكار لي جابو هما المقااااودة، و ما تبقى من مدارس راهم غير مكملة لافكار هاد المدارس الاربعة المحورية.
المهم، حنا غانشوفو فكل حلقة الافكار ديال كل مدرسة (الطوطال ديالهم 8) الا عجبكم هادشي و لقيتوه مهم.
غير باش تكون عندكم فكرة على دوك 4 مدارس محورية:
-المدرسة الكلاسيكية (Ecole classique) : هي اصلا كانت جامعا واحد المجموعة ديال المهندسين لي كايفكرو فاستعمال ديال علوم الهندسة من اجل التنظيم و الانتاج الفعال و هادشي مبني اساسا على "تقسيم" العمل و الادوار (مهم انشوفوها مزيان فاول حلقة).
-مدرسة العلاقات الانسانية او السلوكية Ecole des relations humaine) Comportementali
==> هاد زوج مدارس لي يالاه دكرت، الافكار ديالهم متناقضة (و متكاملة فحاجة وحدة اللي هي "تقسييم" العمل) الشيء لي كايخليهم يشكلو لينا واحد العقدة صعيبة. المهم هاهو واحد الفيلم ديال شارلي شابلن اللي كايصور لينا افكار ديال المدرسة السلوكية (Les temps modernes).
-مدرسة الطوارئ (Ecole de contingence) : هاد المدرسة هي اللي كاتقول ان البيئة راه هي كلشي، هي اللي كاتحكم فالبنية ديال المقاولة. هاد المدرسة تاهيا كاتناقض المدرسة الكلاسيكية في الافتراض ديالها لي كايقول ان البنيات الكلاسيكية ديالهم هما المثاليين (Postulat : One Best Way )، هاد المدرسة كاتقول انه مايمكنش لينا نسميو شي بنية بالمثالية حيت السلوك ديال البيئة ديما كايتبدل دونك فان البنية ديال المقاولة تاهي خاصها تبدل.
-المدرسة الاجتماعية و الاقتصادية (Ecole sociologique et économique): هادي هي اخر مدرسة، هي اللي غادي تولد لينا الكلمة "management" و غادي تعمق فمجموعة من المبادئ اللي طرحاتهم المدرسة السلوكية فحال "Direction Participatif Par Objectif"، و هاد المدرسة كاتهتم بالجانب الاجتماعي للعمال. و كاتعتامد على تحليل العلوم الاقتصادية.
بس1:الصورة 1 خاصة بSchéma de Richard Scott
بس2:الصورة 2 عبارة عن مخطط زمني للمدارس من نهار بانو.
نتمنى انني فدتكم، هادي غير المقدمة، انا متاكد ان الحلقات الجاية غادي تزيد تعجبكم حيت غادي تهتم بافكار ديال هادوك المدارس، و غادي تعرفو اهم الباحثين و بزااف ديال المبادئ اللي ممكن تكونو سمعتو بيها من قبل.
كتب دايكونومي
المرجع: le livre "Théories des organisations" de Roger Aim
0 التعليقات
